10-р сарын 12-нд Олон Улсын Валютын Сан (ОУВС) Дэлхийн эдийн засгийн төлөв байдлын тайлангийн хамгийн сүүлийн дугаарыг (цаашид "Тайлан" гэх) гаргалаа. ОУВС "Тайлан"-д 2021 оны эдийн засгийн өсөлтийн хэмжээ 5.9% байх төлөвтэй байгаа бөгөөд өсөлтийн хэмжээ 7-р сарын урьдчилсан тооцооноос 0.1 пунктээр бага байна гэж онцолсон. Дэлхийн эдийн засгийн хөгжил сэргэж байгаа ч шинэ титэм уушгины хатгалгааны тахал эдийн засгийн хөгжилд илүү удаан үргэлжлэх болно гэж ОУВС үзэж байна. Дельта омгийн хурдацтай тархалт нь тахал өвчний төлөвийн тодорхойгүй байдлыг улам бүр нэмэгдүүлж, ажил эрхлэлтийн өсөлт удааширч, инфляци нэмэгдэж, хүнсний аюулгүй байдал, цаг уурын өөрчлөлт зэрэг асуудлууд янз бүрийн эдийн засагт олон бэрхшээл учруулж байна.
"Тайлан"-д 2021 оны дөрөвдүгээр улиралд дэлхийн эдийн засгийн өсөлтийн хурд 4.5% байх төлөвтэй байна (өөр өөр эдийн засаг харилцан адилгүй). 2021 онд хөгжингүй эдийн засгийн орнуудын эдийн засаг 5.2%-иар өсөх бөгөөд энэ нь 7-р сарын урьдчилсан тооцооноос 0.4 хувиар буурсан үзүүлэлт; шинээр гарч ирж буй зах зээл болон хөгжиж буй эдийн засгийн орнуудын эдийн засаг 6.4%-иар өсөх бөгөөд энэ нь 7-р сарын урьдчилсан тооцооноос 0.1 хувиар өссөн үзүүлэлт юм. Дэлхийн томоохон эдийн засагтай орнуудын дунд эдийн засгийн хөгжлийн өсөлтийн хурд Хятадад 8.0%, АНУ-д 6.0%, Японд 2.4%, Германд 3.1%, Их Британид 6.8%, Энэтхэгт 9.5%, Францад 6.3% байна. "Тайлан"-д дэлхийн эдийн засаг 2022 онд 4.9%-иар өсөх төлөвтэй байгаа нь 7-р сарын урьдчилсан тооцоотой ижил байна гэж таамаглаж байна.
ОУВС-гийн ерөнхий эдийн засагч Гита Гопинат (Gita Gopinath) вакцины хүртээмж болон бодлогын дэмжлэгийн ялгаа зэрэг хүчин зүйлсээс шалтгаалан янз бүрийн эдийн засгийн хөгжлийн хэтийн төлөв зөрж байгаа нь дэлхийн эдийн засгийн сэргэлтэд тулгарч буй гол асуудал гэж мэдэгдэв. Дэлхийн хангамжийн сүлжээний гол холбоосууд тасалдаж, тасалдал хүлээгдэж байснаас удаан үргэлжилж байгаа тул олон эдийн засагт инфляцийн нөхцөл байдал хүндэрч, эдийн засгийн сэргэлтэд эрсдэл нэмэгдэж, бодлогын хариу арга хэмжээ авахад хүндрэл учруулж байна.